He huna thusawitu, Vanlalsailova chuan candidate atana puan a nih ațanga party hruaitute leh Campaign Committee hmalakna leh ţawiawmna zawng zawngah lawmthu sawiin, unit leh block thawhrimna leh inpeknaah lawmthu a sawi.

Vanlalsailova chuan, "Kan bial hi opposition bial aţanga ruling biala awm ve tur leh he bial chhanchhuak tur hian, party sawi lova min vote vek turin ka ngen che u a ni," a ti a. Kum 2023 inthlana hnehna a chan zawh loh avangin bial mipuite hnenah ngaihdam a dil.

"Kan bialtu MLA boral ta Lalrintluanga Sailo hmalakna leh duhthusam tihlawhtling tur leh ruling bial ni ngei turin, ruling bial nih leh theihna hun țha rawn inher chhuakah hian theih tawp min chhuahpui turin ka ngen che u a. Chutih rualin ka elpuite hi thiamna leh tawnhriatah pawh ka tluk lohte an ni. Amaherawhchu, he bial hmangaihna kawngah hi chuan min tluk lo ang," a ti a. "Ka tlak nawn leh chuan a zahthlak hle dawn a ni,” a ti bawk.

C. Lalsawivunga, Minister pawhin thu sawiin, “Opposition party-te hi, ram leh hnam kaihhruaina tur policy mumal tak an nei lo em maw ni tih turin, an thu sawi tam ber chu ZPM sawichhiat a ni ber mai a. Dikna leh rinawmna nen kan ram tan ke i pen ang u. Rem leh rem lo va tute emaw sawichhiat bawih bawih te hi i ti ve lo ang u," a ti.

Vawiina Dampa Bial By Election Campaign Kick-off hi Rev. Lalremliana Colney, Chairman, Mizoram People's Forum, West Phaileng chuan a kaihruai a, Dr. C. Lalrammawia, Secretary, Dampa Bial By-Election Campaign Committee chuan report a pe a, Lawmthanga, Mizoram Poor Federation, tunhnaia ZPM party zawmtu chuan thu a sawi bawk.